Xəbərlər
06.07.2026 13:43
125
TikTok-da yayılan sağlamlıq məsləhətləri risk yaradır
Böyük Britaniyanın Milli Səhiyyə Xidməti sosial mediada, xüsusilə TikTok platformasında yayılan yanlış tibbi məlumatların ictimai sağlamlıq üçün ciddi təhlükə yaratdığı barədə xəbərdarlıq edib. Qurumun nümayəndələri bildirirlər ki, son dövrlərdə xüsusilə gənclər sosial şəbəkələrdə izlədikləri videolara əsaslanaraq özlərinə DEHB, autizm və digər psixi pozuntular diaqnozu qoymağa başlayırlar.
QHT.az xarici mediaya istinadən bildirir ki, qısa videolarda adi davranışların xəstəlik əlaməti kimi təqdim edilməsi insanların həkim müayinəsi olmadan yanlış nəticələr çıxarmasına səbəb olur. Bundan əlavə, sosial mediada yayılan əsassız iddialar bəzi insanların kontraseptiv həblərdən və digər tibbi müalicələrdən imtina etməsinə də gətirib çıxarır.
Mütəxəssislər vurğulayırlar ki, tibbi məlumatlar yalnız etibarlı mənbələrdən və peşəkar həkimlərdən əldə edilməlidir. Yanlış məlumatların qarşısını almaq üçün NHS artıq gənclərin daha çox istifadə etdiyi platformalarda rəsmi hesablar açaraq elmi əsaslı sağlamlıq məzmunu paylaşmağa başlayacağını açıqlayıb. Məqsəd dezinformasiyanın yayılmasının qarşısını almaq və istifadəçiləri düzgün məlumatlandırmaqdır.
Piranə Xasiyeva